Ubuntu tablet နှင့် စမတ်ဖုန်းများ ၂၀၁၃ တွင် ထွက်ပေါ်လာဖွယ်ရှိ

Linux အခြေခံ open source operating system (OS) ဖြစ်သည့် Ubuntu ကို အခြေခံထားသည့် tablet နှင့် စမတ်ဖုန်းများ ထုတ်လုပ်ရန် အတွက်  ဆက်စပ်ပစ္စည်း ထုတ်လုပ်သည့် ကုမ္ပဏီများ ဆွေးနွေးတိုင်ပင်နေကြောင်း Canonical ဆော့ဖ်ဝဲကုမ္ပဏီမှ ပြောကြားခဲ့ပြီး ယင်းထုတ်ကုန်သစ်များကို လာမည့် ၂၀၁၃ ခုနှစ်အတွင်း ဈေးကွက်ထဲ၌ စတင် မြင်တွေ့ရန် မျှော်လင့်ထားကြောင်း သိရသည်။

အဆိုပါ သတင်းကို Canonical ၏ ထိပ်တန်းကိုယ်စားလှယ် တစ်ဦးဖြစ်သည့် Yu Liqaing က tech.sina.com.cn သို့ ပြောကြားခဲ့ခြင်း ဖြစ်ပြီး ဆက်စပ်ပစ္စည်း ကုမ္ပဏီများကလည်း ၎င်းကိစ္စတွင် စိတ်ပါဝင်စားမှု ရှိကြောင်းနှင့် Ubuntu အသုံးပြု tablet များကို ပိုမိုထုတ်လုပ်ရန် ဆန္ဒရှိကြောင်း ပြောကြားခဲ့သည်ဟု ဖော်ပြထားသည်။

ကုမ္ပဏီ၏ ဈေးကွက်အုပ်ချုပ်ရေးမှူး တစ်ဦးဖြစ်သူ Dan Han ကလည်း ၎င်းတို့ ကုမ္ပဏီအနေဖြင့် Ubuntu အခြေခံ desktop နှင့် laptop များကို ဈေးကွက်အတွင်း တင်ပို့ရောင်းချခြင်းဖြင့် ၎င်းတို့၏ လက်လီစတိုးများမှ ရောင်းချသည့် ဈေးကွက်ကို ပိုမို ချဲ့ထွင်မည်ဖြစ်ကြောင်း ပြောကြားခဲ့သည်။ HP ကုမ္ပဏီမှလည်း Ubuntu အခြေခံ desktop နှင့် laptop များကို  မကြာမီအချိန်အတွင်း စတင်ဖြန့်ဖြူးတော့မည် ဖြစ်ကြောင်း Dan  က ဆက်လက် ပြောကြားခဲ့သည်။ Canonical ကို စတင်တည်ထောင်ခဲ့သူ Mark Shuttleworth သည် ပြီးခဲ့သည့်နှစ်မှ စတင်ပြီး tablet နှင့် စမတ်ဖုန်း ဈေးကွက်အပေါ် ၎င်း၏ စိတ်ဝင်စားမှုကို ဖော်ပြခဲ့ခြင်းဖြစ်သည်။  
ဟေမာ
Ref: ZDNet Asia

Posted in: နည်းပညာ သတင်း