အလုပ်လျှောက်လွာ CV ဘယ်လိုရေးရမယ်

နိုင်ငံတကာမှာ သတ်မှတ်ထားတဲ့ CV ဖောင် Standard အမျိုးမျိုး ရှိပါတယ်။ အမေရိကန်စံညွန်း၊ အင်္ဂလန်စံညွန်း၊ သြဇီ စံညွန်း တို့အပြင် နိုင်ငံတစ်ခု တည်းမှာကိုတင် သုံးလေးခု မက ကွဲတာမျိုးတွေလည်း ရှိတတ်ပါတယ်။ CV ဖောင်ရဲ့  အဓိက ရည်ရွယ်ချက်က အလုပ်ရဖို့ပါပဲ။ ဒီတော့ မြန်မာပြည်က  အလုပ်လျှောက်တဲ့ သူများအနေနဲ့ ဘယ်လိုဆီဗီရေးဖို့လိုအပ်တယ်ဆို တာကိုလည်း သိထားဖို့ လိုအပ်ပါသေးတယ်။

အချို့  က အလုပ်လျှောက်ကြပြီး ဆီဗီထဲမှာ အချက်အလက်ပြည့်ပြည့်စုံစုံ ပါမလာပါဘူး။ အချို့ ကျတော့လည်း အချက်အလက်တွေ များပေမယ့် လိုချင်တဲ့ အချက်အလက်ကို မရောက်ရပြန်ပါဘူး။ ကုမ္မဏီ တော်တော် များများကတော့ အလုပ်လျှောက်သူ တင်လာတဲ့ ဆီဗီ အပြင် သူတို့ Format ဆီဗီကိုပါ ထပ်ဖြည့်ခိုင်းတဲ့အခါမျိုးတွေ ရှိပါတယ်။  အစကတော့ အင်တာနက်ကနေ ရှာရှာဖွေဖွေနဲ့ ဟိုလိုလေးရေးရင် ကောင်းမလား၊ ဒီလိုလေး ရေးရင် ကောင်းမလားလို့ စဉ်းစားရတာမျိုး ရှိပါတယ်။ ကုမ္မဏီတစ်ခုကို အသားလွတ်သွားလျှောက်ဖို့အတွက် ကိုယ့် CV က ရှေ့ ပြေး တပ်သား ဆိုတာ အရေးအကြီးဆုံး အခန်းကဏ္ဍမှာ ပါဝင်ပါတယ်။ CV မှာ အရေးအကြီးတဲ့ အချက်အချို့  က အောက်ပါအတိုင်း ဖြစ်ပါတယ်။

၁။ အမည်   -ဒါကတော့ မေးနေစရာတောင် မလိုပါဘူး။ အမည်မပါတဲ့ ဆီဗီဆို CV လို့တောင် မခေါ်ပါဘူး။

၂။ အဖ အမည် - ဘာရယ်လို့တော့ မဟုတ်ဘူး။ ဆီဗီမှာ အဖ အမည်ကတော့ ထည့်ထည့်ရေးတာ ဟိုးအရင် ကတည်းက နိုင်ငံတကာ စံညွန်း ဖြစ်ပါတယ်။ အမိ အမည်တောင် အချို့ ဆီဗီမှာ ထည့်ပေမယ့် အချို့ ဆီဗီမှာကျ မလိုအပ်ပါဘူး။

၃။ မွေးသက္ကရာဇ် - အသက်ကလည်း အရေးကြီးပါတယ်။ အသက်ဖြည့်မထားပဲ လျှောက်လို့မရတာလည်း လူတိုင်းသိပါတယ်။ အသက် အရွယ်ကြည့်ပြီးတော့လည်း အလုပ်ခန့်ပါတယ်။

၎။ မှတ်ပုံတင် နံပါတ် - မှတ်ပုံတင်နံပါတ်၊ယာဉ်မောင်းလိုင်စင်၊ ပတ်စ်ပို့ နံပါတ် အစရှိသဖြင့် ရှိရင် ရှိသလို ထည့်ပေးတာ အကောင်းဆုံး ပါပဲ။
၅။ ကိုးကွယ်သည့် ဘာသာ - ဒါကလည်း လိုအပ်ပါတယ်။ သိပ်အများကြီးရှင်းပြနေစရာလိုမယ် မထင်ပါဘူး။

၆။ အိမ်ထောင်ရှိမရှိ - ဒါကလည်း လိုအပ်ပါတယ်။ ဥပမာ မိသားစု ကြောင့် အလုပ်အပေါ် ဂရုစိုက်နိုင်မှု ရှိမရှိကို သိချင်တာမျိုး ဖြစ်ပါတယ်။

၇။ ပညာအရည်အချင်း - ပညာအရည်အချင်း ဘယ်လောက်ရှိလဲဆိုတာကို ကြည့်ပြီးမှ အလုပ်တစ်ခုက သင့်တော်မတော် ရွေးချယ်တာ ဖြစ်ပါတယ်။  ဒီနေရာက အရေးကြီးဆုံးလို့ဆိုလဲ မမှားပါဘူး။ ကိုယ်လုပ်မယ့် အလုပ်နဲ့ အဆင့်မှီတဲ့ ပညာအရည်အချင်း ရှိမရှိကြည့်ကြတာ မို့ ဖြစ်ပါတယ်။

-    ဘာသာစကား ကျွမ်းကျင်မှုက ပညာအရည်အချင်းခေါင်းစဉ်ထဲမှာပါပါတယ်။ ဒီမှာလည်း ကိုယ်တတ်ကျွမ်းတဲ့ ဘာသာစကား၊ စာပေကို လျှောက်တဲ့အလုပ်နဲ့ ဆီလျော်သလို ဖြည့်ပေးဖို့လိုအပ်ပါတယ်။ Good, Fair, Very Good တိုလို သတ်မှတ်ရတာမျိုးလည်း ရှိပါတယ်။ နောက်တစ်ခုက Typing skill။ ဒါကတော့ နည်းပါတယ်။ Typing speed ဖြည့်ရတာက စာစီစာရိုက်များများ လုပ်ရတဲ့ အလုပ်တွေမှာကျ ထည့်ခိုင်းတတ်ပါတယ်။ မလိုအပ်ရင်တော့ တကူးတက ထည့်စရာမလိုပါဘူး။

၈။ အလုပ်အကိုင် အတွေ့အကြုံ  - အရင်က လုပ်ခဲ့တာတွေကို စလုပ်တဲ့အချိန်ကနေ ပြီးတဲ့ အချိန်အထိကို ထည့်ရေးရမှာ ဖြစ်ပါတယ်။
- ယခင် အလုပ်မှ လစာ  - အဲဒါကို အလုပ်အကိုင်အတွေ့အကြုံမှာ ကိုယ်လုပ်ခဲ့တဲ့ ကုမ္မဏီတိုင်းရဲ့  ဘေးမှာ ဖြစ်ဖြစ်၊ အောက်မှာ ဖြစ်ဖြစ် ဇယားနဲ့သော်လည်းကောင်း ထည့်ထားတာ အကောင်းဆုံးပါပဲ။

၉။ ထွက်ရသည့် အကြောင်းအရင်း - ဒါကလည်း လိုအပ်ပါသေးတယ်။ ကုမ္မဏီတိုင်းက အရင်အလုပ်ကနေ ဘာလို့ထွက်လဲ ဆိုတာကို စိတ်ဝင်စားပါတယ်။ Reason of leaving ကိုလည်း ဖြည့်ဖို့လိုအပ်ပါတယ်။

၁၀။ ကျွမ်းကျင်သော အလုပ် - Job Interested (စိတ်ပါဝင်စာသော အလုပ်) လို့လည်း ခေါ်ပါတယ်။ ဒီမှာကျ ကိုယ် ဘာတွေလုပ်နိုင်တယ်။ ဘယ်လိုလုပ်နိုင်တယ်ဆိုတာကို အတိုဆုံး၊ အလွယ်ဆို ဝါကျနဲ့ရေးဖို့ လိုအပ်ပါတယ်။

၁၁။ လျှောက်ထားလိုသော ရာထူး - အချို့ က ကိုယ့်ကိုယ်ကို ဘယ် Position လျှောက်လို့လျှောက်မှန်း မသိကြပါဘူး။ သင့်လျော်ရာ အလုပ်ဆိုပြီး ရေးတဲ့သူတွေတောင် ရှိပါသေးတယ်။ ဒီမှာတင် ကိုယ့်ရဲ့  Impression က ကျသွားပါတယ်။ ဘယ်လိုပဲ ဖြစ်ဖြစ် ကိုယ်စိတ်ဝင်စားတဲ့ အလုပ်ကို တစ်ခုခုရွေးပြီး အသေအချာ လျှောက်သင့်ပါတယ်။

၁၂။ မျော်မှန်းလစာ  - ကိုယ် လစာဘယ်လောက် လိုချင်တာကိုလည်း ထည့်ကိုထည့်ရမယ့် အရာ ဖြစ်ပါတယ်။ ဒီမှာရေးလိုက်တဲ့ လစာကလည်း ကိုယ့်ရဲ့  တန်ဖိုးပါပဲ။ အားနာလို့ လစာလျော့ရေးလိုက်တာမျိုး၊ အလုပ်မရမှာစိုးလို့ လစာ လျော့ရေးလိုက်တာမျိုးကမှားယွင်းတဲ့ လုပ်ရပ် ဖြစ်ပါတယ်။ ဒါကြောင့် ကိုယ်လစာ ဘယ်လောက်ရသင့်တယ်ဆိုတာ ပတ်ဝန်းကျင်မှာ သေချာလေ့လာပြီး ကိုယ့်အရည်အချင်းနဲ့ဆို ရသင့်တယ်လို့ ယူဆတဲ့ ပမာဏလေး ထည့်ရေးဖို့လိုအပ်ပါတယ်။ ဒီမှာလည်း များများလိုချင်လို့ ပိုရေးလိုက်တယ်ဆိုရင်လည်း မရနိုင်တော့ပါဘူး။

၁၃။ လုပ်ကိုင်ပေးနိုင်သည့် အတိုင်းအတာ - ဒီထဲမှာ ပါဝင်တာတွေကတော့ ဝန်ခံချက်များ ဖြစ်ပါတယ်။ ဥပမာ- နယ်ဝေးခရီးသွားနိုင်မသွားနိုင်တို့၊ ပင်လယ်ရေခြားမြေခြားသွားနိုင်မသွားနိုင်တို့၊ အိုဗာတိုင်း ဆင်းနိုင်မဆင်း နိုင်တို့ ဖြစ်ပါတယ်။ ဒါကိုလည်းသေချာ ဇယားနဲ့လုပ်လို့ Yes နဲ့ No သုံးရုံပဲ ဖြစ်ပါတယ်။

၁၄။ ဝါသနာ - ( Persoanal Interset) လို့ရေးတာ အကောင်းဆုံးပါပဲ။ ဒီမှာကျ တကယ်ပဲ ကိုယ်ဝါသနာ ပါတာ ပွင့်ပွင့်လင်းလင်း ရေးလို့ ရပါတယ်။ ဥပမာ -ရေကူး၊ ဘောလုံးကန်၊ ရုပ်ရှင်ကြည့် အစရှိသဖြင့်ပေါ့။

၁၅။ ဆက်သွယ်ရန် - ကိုယ့်ကို ဆက်သွယ်ဖို့ လိပ်စာ၊ ဖုန်းနံပါတ်၊ အီးမေးလ် အစရှိသဖြင့် စုံစုံလင်လင် ထည့်ဖို့လိုအပ်ပါတယ်။ ဒါကို သေချာ ထည့်မှလည်း ကိုယ့်ကို ပြန်ပြီးဆက်သွယ်နိုင်မှာမို့ ဖြစ်ပါတယ်။

၁။ ဓာတ်ပုံ - အရေးအကြီးဆုံးအချက်ဖြစ်ပါတယ်။ CV တစ်ခုမှာ အရေးကြီးတာ တစ်ခုကလည်း ဓာတ်ပုံပါပဲ။ အရင် နှစ်က ရိုက်ထားတဲ့ ပုံလေးက လှလို့ ဒါလေးပဲ ထည့်လိုက်မယ် ဆိုတာမျိုးမလုပ်ရပါဘူး။ ၃ လအတောအတွင်းဆိုရင် သုံးလို့အဆင်ပြေပါနိုင်ပါတယ်။ အကောင်းဆုံး ကတော့ တစ်ပတ်အတွင်းပါပဲ။ အချို့ ဆို နက်ဖန်လျှောက်ဖို့အတွက် ဒီနေ့ ဓာတ်ပုံပြေးရိုက်တာမျိုးလုပ်ပါတယ်။ ဘယ်လိုပဲ ဖြစ်ဖြစ် အဆင်ပြေပါတယ်။
--

အထက်ပါ ဖော်ပြပါ အချက်များက အကြမ်းဖျင်းပါပဲ။ တကယ် ဆီဗီ ဖြည့်တော့မယ်ဆိုရင် မပါမဖြစ်ပါရမယ့် ဟာမို့ ဖြစ်ပါတယ်။ ပြီးတော့ ဆီဗီကို အင်္ဂလိပ်လို ရေးတာ အကောင်းဆုံး ဖြစ်ပါတယ်။ ဒီတော့ ဆီဗီရေးတော့မယ် ဆိုတော့ ကိုယ်က မသိရင် လေ့လာတာက အကောင်းဆုံးပါပဲ။ အင်္ဂလိပ်စာ အသုံးအနှုန်းတွေ ပြန်လေ့လာဖို့ ဖြစ်ပါတယ်။ Google Search မှာ Standard CV Form Download လို့ စာရိုက်ပြီး ကိုယ်စိတ်ကြိုက် တွေ့ရာ ရှာဖွေနိုင်ပါတယ်။ အဲ့ထဲမှာမှ ကိုယ့်နဲ့အသင့်တော်ဆုံးလို့ ထင်တဲ့ဟာကို ရွေးပြီး download ဆွဲလို့ ရေးသားဖြည့်ဆွက် နိုင်ပါတယ်။ အများကြီးလည်း မလိုအပ်ပါဘူး။ Simple CV လို့ရိုက်ရှာပြီးလည်း ဖြည့်နိုင်ပါတယ်။ သို့တည်းမဟုတ် ကိုယ်က Excel တတ်ထားတယ် ဆိုရင် Excel ဖိုင်တစ်ခုဖွင့်လို့ ကိုယ့် ဆီဗီ ကိုယ်အဆင်ပြေသလို ဖြည့်ဆွက်တာလည်း အကောင်းဆုံးပါပဲ။ Excel မဟုတ်ပဲ Office Word မှာလည်း ဇယားကွက်ချလို့ လုပ်လုိ့လည်းရပါတယ်။

ဒီမှာ အများကြီးခေါင်းစားစရာမလိုပါဘူး။ ကုမ္မဏီတော်တော်များများက ကိုယ်ပိုင် CV Format ရှိပါတယ်။ ကိုယ်တင်လိုက်ပြီး နောက်တစ် ခေါက် ကတော့ ထည့်ဖြည့်ရအုံးမှာ ဖြစ်ပါတယ်။ ဒီတော့ ကိုယ်တင်လိုက်မယ့် ရှေ့ ပြေးဆီဗီက အထက်ပါ ပြထားတဲ့ အချက်လေးတွေနဲ့ ဆိုရင်တောင် လုံလောက်ပါတယ်။ ကိုယ့်ကို Recommand ဘယ်သူပေးတာ လည်းဆိုတာ ကိုလည်း လိုအပ်မယ်ထင်ရင် ထည့်ရေးနိုင်ပါတယ်။ Signature (လက်မှတ်)ကိုလည်း  CV အပိတ်မှာထိုးနိုင်ပါတယ်။ ဒီတော့ အများကြီး အတွေးရှုပ်နေစရာ မလိုပါဘူး။

အထက်ပါ အရေးကြီး အချက်အလက်ပါတဲ့ ဖောင်ကို အရှင်းလင်းဆုံး ပြုလုပ် သို့မဟုတ် download ဆွဲပြီး လုပ်မယ်။ အင်္ဂလိပ်စာမှန်မှန်နဲ့ သေချာဖြည့်ဆွက် မယ်ဆိုရင် လုံလောက်ပါပြီ။ ဒါဆိုရင် သင့်လျော်ပါပြီ။ ရိုးရိုးနဲ့ ရှင်းရှင်းပြောရရင် လုပ်ငန်းရှင်တွေ CV တစ်ခုကို ကြည့်မယ်ဆိုရင် အဓိကထားမှာက ပညာအရည်အချင်း၊ အသက်၊ အရင်လုပ်ခဲ့တဲ့ ကုမ္မဏီ၊ မျှော်မှန်းလစာ တို့လောက်ပါပဲ။ သို့ပေမယ့် ပြည့်ပြည့်စုံစုံရေးပို့ရမှာကတော့ ကိုယ့်တာဝန်ပဲ ဖြစ်ပါတယ်။ ဒီလောက်ဆို ကိုယ်နိုင်အဆင်ပြေမယ့် အလုပ်လျှောက်လွှာရေးနိုင်ပြီလို့ မျှော်လင့်ပါတယ်။
 --
အောင်ခမ်း

Posted in: ဗဟုသုတ