တန်ဖိုးနည်း GSM ဖုန်း မတ်လ ပထမအပတ် အတွင်း စတင် သုံးစွဲခွင့် ပြုမည်

တန်ဖိုးနည်း GSM ဖုန်းများကို မတ်လ ပထမအပတ်အတွင်း အများပြည်သူများသို့ စတင်သုံးစွဲခွင့် ပြုမည်ဖြစ်ကြောင်း  မြန်မာ့ဆက်သွယ်ရေး လုပ်ငန်းတာဝန်ရှိသူ တစ်ဦးက ပြောကြားသည်။ “တန်ဖိုးနည်း GSM ဖုန်းတွေကို မတ်လ ပထမပတ်အတွင်း ချပေးမယ်။ အရင်က ပြောထားတဲ့ အတိုင်းပဲ One stop Servie စနစ်နဲ့ပဲ ရောင်းချပေးသွားမှာပါ” ဟု မြန်မာ့ဆက်သွယ်ရေး လုပ်ငန်းမှ တာဝန်ရှိသူ တစ်ဦးက ပြောသည်။

 

အဆိုပါ တန်ဖိုးနည်း GSM ဖုန်းစီမံကိန်းကို ၂၀၁၁ ခုနှစ် ဇူလိုင်လ ၂၇ ရက်နေ့တွင် စတင်ဆောင်ရွက်ခဲ့ကြောင်း၊ မတ်လအတွင်း အများပြည်သူများကို ချပေးနိုင်ရန် စီစဉ်နေကြောင်း၊ ဈေးနှုန်းမှာမူ ကျပ်သုံးသိန်း ဝန်းကျင် ဖြစ်ပြီး အဆိုပါ နှုန်းထားထက် ပိုရန်မရှိကြောင်း၊ ဈေးနှုန်း အတိအကျကိုမူ ယခုအချိန်အထိ တိတိကျကျ တွက်ချက်ထားခြင်း မရှိသေးကြောင်း၊ ယခင် GSM ဖုန်းများ ချပေးခဲ့သည့် အတိုင်း လိုအပ်သည့် စာရွက်စာတမ်းများဖြင့် လျှောက်ထားရမည် ဖြစ်ကြောင်း မြန်မာ့ ဆက်သွယ်ရေးလုပ်ငန်းမှ အင်ဂျင်နီယာချုပ် ဦးဇော်မင်းဦးက ဇန်နဝါရီလအတွင်း ပြည်တွင်းမီဒီယာများနှင့် တွေ့ဆုံစဉ် ပြောကြားခဲ့သည်။ မတ်လဆန်း အတွင်း ချပေးမည့် တန်ဖိုးနည်း GSM ဖုန်း ပြောဆိုခမှာ ယခင်နှုန်းထား အတိုင်း တစ်မိနစ် ကျပ် ၅၀ နှုန်း ဖြစ်ပြီး အင်တာနက် ချိတ်ဆက်နိုင်မည့် ဧရိယာအတွင်း အဆိုပါ GSM ဖုန်းနှင့် တွဲဖက်၍ အင်တာနက် ဝင်ဆောင်မှု ပေးသွားမည်ဖြစ်ကြောင်း၊ အင်တာနက် အသုံးပြုရန်အတွက် ထပ်မံ လျှောက်ထားပါက ကျပ် ၁၀၀၀၀ ကျသင့်မည်ဖြစ်ပြီး အသုံးပြုခမှာ တစ်မိနစ်လျှင် လေးကျပ်နှုန်းဖြစ်ကြောင်း သိရသည်။

Posted in: နည်းပညာ သတင်း