ကနဦး အင်တာနက် တပ်ဆင်သုံးစွဲခ အခမဲ့ ပေးတော့မည်

မည်သူမဆို အင်တာနက် သုံးစွဲနိုင်ရန်အတွက် ကနဦး အင်တာနက် တပ်ဆင်သုံးစွဲခများကို အခမဲ့ ပေးသွားနိုင်ရန် အကောင်အထည်ဖော် ဆောင်ရွက်သွားမည် ဖြစ်ကြောင်း ရတနာပုံ တယ်လီပို့ ကုမ္ပဏီလီမိတက်မှ သိရသည်။  “လူတိုင်းလူတိုင်း အင်တာနက် သုံးစွဲနိုင်ရေးအတွက် Zero Initial Set up Fee နဲ့ ဝန်ဆောင်မှု ပေးနိုင်ဖို့အတွက် အကောင်အထည်ဖော် ဆောင်ရွက်သွားမှာ ဖြစ်ပါတယ်” ဟု ရတနာပုံ တယ်လီပို့ ကုမ္ပဏီလီမိတက်မှ တာဝန်ရှိသူ တစ်ဦးက ပြောသည်။ (၁၁) ကြိမ်မြောက် အာဆီယံ ဆက်သွယ်ရေးနှင့် သတင်းအချက်အလက် နည်းပညာဆိုင်ရာ ဝန်ကြီးများအဆင့် အစည်းအဝေး အခမ်းအနား၌ နိုင်ငံတော် သမ္မတကြီးက မိန့်ကြားခဲ့သော မိန့်ခွန်းတွင် ၂၀၁၄ ခုနှစ်တွင် အာဆီယံ ဥက္ကဋ္ဌ တာဝန်ယူရန်အတွက် လိုအပ်သည့် ပြင်ဆင်မှုများ အားလုံးတွင်လည်း အိုင်စီတီကို အဓိကထားပြီး ဆောင်ရွက်သွားမည် ဖြစ်ကြောင်း၊ ကျေးလက်နေ ပြည်သူများအထိ အိုင်စီတီ အသုံးပြုမှု ပျံ့နှံ့သွားစေရေးတို့ အတွက် မိမိတို့ အစိုးရသစ် လက်ထက်တွင် တိုးချဲ့ ဆောင်ရွက်လျက်ရှိကြောင်း ပြောသည်။

“Connection ပိုင်းကို တစ်မြို့လုံး လွှမ်းခြုံမှု ရှိအောင်တော့ ဆောင်ရွက်ပေးထားတယ်။ ၈၅ ရာခိုင်နှုန်းလောက်တော့ ရတယ်။ ဒီက လိုင်းအခြေအနေက ကိုရီးယားနဲ့ စင်ကာပူထက် သုံးဆလောက် မြင့်တယ်။ တစ်ဦးချင်း သုံးစွဲတဲ့ User ပေါ်မှာ မူတည်တယ်။ ယူတဲ့ Service Plan ပေါ်မှာလဲ မူတည်တယ်” ဟု Red Link မှ Senior Vice President ဦးရှိန်းသူအောင်က ပြောသည်။ လက်ရှိ မြန်မာနိုင်ငံ၏ အင်တာနက် အသုံးပြုသည့် Subscriber သည် လေးသောင်းခန့်သာ ရှိသည့်အတွက် Population Penetration ၏ ၀ ဒသမ ၈ ရာခိုင်နှုန်းသာရှိပြီး အိမ်နီးချင်း အာရှနိုင်ငံများ၊ အာဆီယံနိုင်ငံများနှင့် ယှဉ်ကြည့်လျှင် ရာခိုင်နှုန်း နည်းပါးနေသေးကြောင်း သိရသည်။ ယခုအခါ WiMAX တိုးချဲ့ စီမံကိန်းအတွက် POP များ တိုးချဲ့ တည်ဆောက် ပြီးစီးခဲ့ပြီး ရန်ကုန်တိုင်းဒေသကြီး တစ်ခုလုံး၏ ၈၅ ရာခိုင်နှုန်း လွှမ်းခြုံမိအောင် တည်ဆောက်ထားကြောင်း၊ ယင်းအပြင် Coverage ရရှိသေးသည့် မြို့နယ်များကိုလည်း ချိတ်ဆက် ဆောင်ရွက်သွားမည်ဖြစ်ကြောင်း သိရသည်။ Red Link Broadband Wi-MAX Service တပ်ဆင်ပါက ကျပ်ခြောက်သိန်းသုံးသောင်း ကုန်ကျမည်ဖြစ်ပြီး Service Plan အနေဖြင့် သုံးမျိုး ခွဲခြားထားကြောင်း သိရသည်။

ဖူးပွင့်သော်

Posted in: နည်းပညာ သတင်း