CDMA 800 နောက်ထပ်လေးမြို့ သုံးစွဲနိုင်အောင် ဆောင်ရွက်နေ

CDMA 800 MHz ဖုန်းများ နောက်ထပ်မြို့ကြီးလေးမြို့တွင် သုံးစွဲနိုင်ရန် ဆောင်ရွက်နေကြောင်း  မြန်မာ့ဆက်သွယ်ရေးလုပ်ငန်းမှ သိရသည်။ “CDMA 450 MHz သုံးစွဲနိုင်တဲ့ မြို့တွေအားလုံးနီးပါး ၈၀၀ ဖုန်းတွေ သုံးစွဲနိုင်အောင် ဆောင်ရွက်သွားဖို့ ရှိပါတယ်။ လက်ရှိ ဆောင်ရွက်ပေးဖို့ စီစဉ်ထားတာ ၁၄ မြို့ရှိပါတယ်။ ထက်ဝက်ကျော်လောက်တော့ ဆောင်ရွက်ပြီးပါပြီ။ နောက်ထပ် ကျန်တဲ့မြို့တွေကိုတော့ သူ့အပိုင်းနဲ့သူ တဖြည်းဖြည်း ဆောင်ရွက်ပေးသွားဖို့ ရှိပါတယ်” ဟု မြန်မာ့ဆက်သွယ်ရေးလုပ်ငန်း အကြီးတန်းအရာရှိတစ်ဦးက ပြောသည်။

 

ထပ်မံ သုံးစွဲခွင့်ပေးရန် ဆောင်ရွက်နေသည့် မြို့ကြီးလေးမြို့မှာ စစ်တွေ၊ ထားဝယ်၊ တောင်ကြီးနှင့် မြစ်ကြီးနားမြို့များဖြစ်ပြီး ယခုနှစ်အတွင်း အပြီးသတ် ဆောင်ရွက်သွားမည်ဖြစ်ကြောင်း မြန်မာ့ဆက်သွယ်ရေးမှ သိရသည်။ “ဖုန်းသုံးစွဲခွင့်နဲ့ အင်တာနက် သုံးစွဲခွင့်ပါ ပေးသွားမှာပါ။ အင်တာနက်စနစ်ကိုတော့ ဖုန်းအသုံးပြုနိုင်မှပဲ ဆက်လက်ဆောင်ရွက်မှာပါ။ သုံးစွဲမှု ပိုများတဲ့ မြို့ကြီးတွေကို ဦးစားပေး ဆောင်ရွက်သွားမှာပါ” ဟု အထက်ပါပုဂ္ဂိုလ်က ဆက်လက်ပြောသည်။ မြန်မာ့ဆက်သွယ်ရေး လုပ်ငန်းမှ ငါးသိန်းတန် CDMA 800 MHz ဖုန်းများအား ၂၀၁၀ နှစ်ဆန်းပိုင်းတွင် စတင်ချထားပေးခဲ့ပြီး ရန်ကုန်တွင် ဖုန်းလိုင်းနှစ်သိန်း၊ မန္တလေးတွင် ငါးသောင်းချထားပေးပြီးနောက် ၂၀၁၁ ဇူလိုင်တွင် ချထားပေးမှု ခေတ္တရပ်ဆိုင်းခဲ့ပြီး အောက်တိုဘာလတွင် ဖုန်းအလုံးရေ တစ်သိန်းခန့်ထပ်မံ ချထားပေးခဲ့ကြောင်း ဆက်သွယ်ရေးမှ သိရသည်။ CDMA 800 MHz များ စတင်ချထားပေးစဉ် ကာလတွင် ရန်ကုန်၊ မန္တလေး၊ နေပြည်တော်မြို့ကြီးသုံးမြို့တွင်သာ သုံးစွဲခွင့်ပေးခဲ့သော်လည်း ၂၀၁၁ ဇူလိုင်မှစတင်၍ မြို့ကြီးသုံးမြို့အပြင် ပဲခူး၊ ပြည်၊တောင်ငူ၊ ဘားအံ၊ မုံရွာ၊ မကွေး၊ မော်လမြိုင်၊ ပုသိမ်စသည့် မြို့ကြီးများကို နယ်မြေ ကန့်သတ်ချက် ပယ်ဖျက်၍ သယ်ဆောင် သုံးစွဲခွင့်ပေးခဲ့သည်။

အောင်ဇော်

Posted in: နည်းပညာ သတင်း