တန်ဖိုးနည်းဖုန်းများ အင်တာနက် သုံးစွဲခွင့် လျှောက်ထားရာတွင် ယခင် ကျပ်ငါးသိန်း ဖုန်းများအတိုင်း ငွေပေးသွင်းရမည်ဟုဆို

လက်ရှိ ချထားပေးလျက်ရှိသော တန်ဖိုးနည်းဖုန်းများ အင်တာနက် သုံးစွဲခွင့် လျှောက်ထားရာတွင် ယခင်ကျပ်ငါးသိန်း ဖုန်းများအတိုင်း ငွေပေးသွင်းရမည်ဖြစ်ကြောင်း  မြန်မာ့ ဆက်သွယ်ရေး လုပ်ငန်းမှ တာဝန်ရှိသူတစ်ဦးက ၂၅-၄-၂၀၁၂ ရက် တွင် ပြောကြားသည်။

“အရင်က ကျပ်ငါးသိန်း ဂျီဖုန်းတွေအတွက် အင်တာနက် သုံးစွဲခွင့်မှာ ငွေကျပ်တစ်သောင်း သွင်းရတယ်။ CDMA 800MHz တွေအတွက်က သုံးသောင်းသွင်းရတယ်။ အခု တန်ဖိုးနည်းဖုန်းတွေ အင်တာနက်လျှောက်ရင်လည်း ဒီလိုပဲ ပေးသွင်းရမှာပါ။ အင်တာနက်သုံးစွဲခွင့်ကို မေလ ပထမပတ်လောက်မှာ GSM ရော၊ WCDMA ကိုပါ ချထားပေးမှာပါ” ဟု ၎င်းက ပြောကြားသည်။

 

တန်ဖိုးနည်းဖုန်းများကို ရောင်းချပေးနေသည့် မိုဘိုင်းဆိုင်တစ်ဆိုင်မှ ပုဂ္ဂိုလ်တစ်ဦးက “အင်တာနက်ကို မေလဆန်းလောက် ချပေးမယ်လို့ ကြားတယ်။ အရင်က ကျပ်တစ်သောင်းလို့ ပြောတယ်။ အခုတော့ သုံးသောင်းလို့လည်း ကြားတယ်။ အတိအကျ မသိရသေးဘူး။ ကျွန်တော်တို့ ဆိုင်တွေမှာပဲ အင်တာနက် လျှောက်လို့ရမှာလား။ ဘယ်မှာ လျှောက်ရမလဲဆိုတာ မပြောသေးဘူး” ဟု အင်တာနက် လျှောက်ထားခွင့်နှင့် ပတ်သက်၍ ပြောကြားသည်။ အင်တာနက်သုံးစွဲခွင့် တိုင်းဒေသကြီးများ၏ မြို့ကြီးများ၌သာ အသုံးပြုနိုင်ပြီး ယခု အသုံးပြုခွင့်ပေးလျှင်လည်း ထိုမြို့ကြီးများအားလုံး အသုံးပြုခွင့် ရရှိမည်ဖြစ်ကြောင်း၊ အင်တာနက် သုံးစွဲခွင့်မှာလည်း ယခင်ဖုန်းများနည်းတူ တစ်မိနစ်လေးကျပ်သာ ကျသင့်မည်ဖြစ်ကြောင်း သိရသည်။

နှင်းနုဝေ

Posted in: နည်းပညာ သတင်း