နိုင်ငံတကာသို့ ခေါ်ဆိုနိုင်သည့် Y talk ခေါ်ဆိုခ မေလ ၁ ရက်မှ စတင်လျှော့ချ

နိုင်ငံတကာသို့ ဖုန်းခေါ်ဆိုနိုင်သည့် Y talk ခေါ်ဆိုခများကို မေလ ၁ ရက်မှ စတင် လျှော့ချလိုက်ပြီ ဖြစ်ကြောင်း  VMG ကုမ္ပဏီ၏ တာဝန်ရှိသူ တစ်ဦးက ၂၅-၄-၂၀၁၂ ရက်တွင် ပြောကြားသည်။

“ကျွန်တော်တို့ရဲ့ Y talk က တရားဝင် အွန်လိုင်းဖုန်းခေါ်ဆိုစနစ် ဆိုပေမယ့် တရားမဝင် Pfingo နဲ့ Skype စနစ်ကို မဖယ်ရှားနိုင်သေးတဲ့ အတွက်ရော နောက်သုံးစွဲသူတွေရဲ့ တောင်းဆိုမှုကြောင့်ရော အခုလို ဈေးနှုန်းတွေ လျှော့ချပေးလိုက်တာပါ။ အရင်က Pfingo နဲ့ ဈေးကွာပေမယ့် အခု Pfingo ဈေးနှုန်းထက် လျော့သွားပါပြီ။ ဒီလို ဈေးလျှော့ချဖို့ကို မြန်မာ့ဆက်သွယ်ရေးရဲ့ ခွင့်ပြုချက်နဲ့ ပြုလုပ်တာပါ” ဟု ယင်းက ပြောကြားသည်။

 

Y talk  စနစ်ဖြင့် နိုင်ငံတကာသို့ ဖုန်းခေါ်ဆိုခမှာ ခေါ်ဆိုသည့် နိုင်ငံပေါ် မူတည်၍ တစ်မိနစ်လျှင် ကျပ် ၁၅၀ မှ ၃၀၀ အထိရှိပြီး၊ မေလ ၁ ရက်မှ စတင်၍ ဈေးနှုန်း လျှော့ချလိုက်ကြောင်း၊ လက်ရှိတွင် Y talk ဖြင့် ဖုန်းခေါ်ဆိုရန် Account တစ်ခု ဝယ်ယူရပြီး ငွေဖြည့်ကတ်ပါ ဝယ်ယူ အသုံးပြုရကြောင်း၊ Y talk စနစ်ကို ရန်ကုန်၊ မန္တလေးနှင့် တောင်ကြီးမြို့များရှိ အင်တာနက်ဆိုင်များတွင်သာ အသုံးပြုနိုင်သေးကြောင်း သိရသည်။ Y talk ခေါ်ဆိုခများကို Pfingo ခေါ်ဆိုခနည်းတူ ဈေးလျှော့ချလိုက်သော်လည်း Y talk စနစ်မှာ အရည်အသွေး ပိုမိုကောင်းမွန်ပြီး အင်တာနက် မြန်နှုန်းကျနေသည့် အချိန်တွင်ပါ အသုံးပြုနိုင်ကြောင်း၊ Y talk သုံးစွဲသည့် VOIP ဆော့ဖ်ဝဲကို အခမဲ့ ဖြန့်ဝေလျက်ရှိပြီး ဝက်ဘ်ဆိုက်များတွင်ပါ အခမဲ့ Download ပြုလုပ်သုံးစွဲနိုင်ရန် စီစဉ်သွားမည်ဖြစ်ကြောင်း သိရသည်။

နှင်းနုဝေ

Posted in: နည်းပညာ သတင်း