အင်တာနက်လိုင်းမလိုဘဲ ပြည်ပသို့ ဖုန်းခေါ်ဆိုနိုင်မည့် ၁၈၇၇ ဝန်ဆောင်မှု ဇူလိုင်လတွင် စတင်မည်

အင်တာနက်လိုင်း ချိတ်ဆက်ထားခြင်း မရှိဘဲ အင်တာနက်မှ တစ်ဆင့် နိုင်ငံခြားသို့ မိုဘိုင်းဖုန်း၊ အော်တိုလယ်လီဖုန်းများဖြင့် ဖုန်းခေါ် ဆိုနိုင်မည့် ၁၈၇၇ ဝန်ဆောင်မှုကို ဇူလိုင်လတွင် စတင်နိုင်ရန် စီစဉ်ထားကြောင်း  Blue Ocean ကုမ္ပဏီမှ မန်နေဂျင်း ဒါရိုက်တာ ဦးထွန်းထွန်းနိုင်က ပြောသည်။

Blue Ocean ကုမ္ပဏီမှာ နိုင်ငံခြားသို့ ဖုန်းခေါ်ဆိုနိုင်မည့် အစီအစဉ်ကို စတင်ရန်အတွက် ရတနာပုံတယ်လီပို့ကုမ္ပဏီ၊ မြန်မာ့ဆက်သွယ်ရေး လုပ်ငန်းတို့နှင့် ဈေးနှုန်း ညှိနှိုင်းမှုများ ပြုလုပ်နေပြီး နိုင်ငံခြား ဖုန်းခေါ်ဆိုမှုအတွက် ကျသင့်ဘီလ်ကို ညှိနှိုင်းဆောင်ရွက်ပြီးပါက အသုံးပြုခွင့် ပေးသွားမည် ဖြစ်ကြောင်း သိရသည်။ အဆိုပါ အစီအစဉ်ကို လာမည့် ဇူလိုင်လအတွင်း စတင်သွားရန် စီစဉ်ထားပြီး နိုင်ငံခြားသို့ ခေါ်ဆိုမည့် ကုတ်နံပါတ်များအား မသိရှိပါက Call Center မှ အကူအညီပေးသွားမည် ဖြစ်ပြီး အဆိုပါ ဝန်ဆောင်မှုအတွက် ဈေးနှုန်း သတ်မှတ်မှုကို အတိအကျ မသတ်မှတ်ရသေးသော်လည်း လက်ရှိ အသုံးပြုနေသည့် ဖုန်းဘီလ်နှုန်းထားများထက် သက်သာမှုရှိစေရမည်ဟု ဦးထွန်းထွန်းနိုင်က ပြောသည်။ “နောက်လဆိုရင် ကျွန်တော်တို့ လုပ်ပါပြီ။ ၁၈၇၇ မှာ နိုင်ငံတကာကို ဖုန်းခေါ်တဲ့ ဆားဗစ်လည်း ဖြစ်ပါတယ်။ မိမိဖုန်းကနေပြီးတော့ ၁၈၇၇ ဆိုတဲ့ ကုတ်ကိုခေါ်ပြီးရင် ကိုယ်ခေါ်ဆိုချင်တဲ့ နိုင်ငံခြားက ဖုန်းတွေကို ခေါ်လို့ရပါပြီ” ဟု Blue Ocean ကုမ္ပဏီမှ တာဝန်ရှိသူတစ်ဦးက ပြောသည်။ မကြာမီ စတင်တော့မည့် Call Center ၏ ၁၈၇၇ ပြည်ပ ဖုန်းခေါ်ဆိုမှု ဝန်ဆောင်မှုမှာ ဈေးနှုန်းချိုသာပါက Pfingo နှင့် Skype တို့ကို ယှဉ်ပြိုင်နိုင်မည် ဖြစ်သည်။

Posted in: နည်းပညာ သတင်း