4G စနစ်အား ရန်ကုန်မြို့တွင် စတင်စမ်းသပ်၊ နေပြည်တော်၊ မန္တလေးနှင့် အခြားမြို့ကြီးများတွင်ပါ တိုးချဲ့ရန် ရည်ရွယ်ဟုဆို

အဆင့်မြင့် မိုဘိုင်းကွန်ရက်ဖြစ်သည့် 4G စနစ် (Long Term Evolution) အား ရန်ကုန်မြို့တွင် စတင်စမ်းသပ် အကောင်အထည် ဖော်လျက်ရှိကြောင်း  ရတနာပုံတယ်လီပို့၏ အနာဂတ်လုပ်ငန်းနှင့် ဝန်ဆောင်မှုများအရ သိရသည်။ အဆိုပါစနစ်အား ရန်ကုန်မြို့အပြင် နောင်တွင် နေပြည်တော်၊ မန္တလေးနှင့် အခြားမြို့ကြီးများတွင်ပါ တိုးချဲ့သွားရန် ရည်ရွယ်ထားကြောင်း သိရသည်။ Data စနစ်ကို အပြည့်အဝ အထောက်အပံ့ပေးမည့် အဆိုပါ 4G ဖုန်းလိုင်းများကို အရှေ့တောင်အာရှ အားကစားပြိုင်ပွဲအမီ ချထားပေးရန် စီစဉ်လျက်ရှိကြောင်း၊ 4G ဖုန်းလိုင်းများအား Long Term Evolution ကွန်ရက်ကို အထောက်အပံ့ ပေးနိုင်သည့် ဟန်းဆက်များနှင့် တွဲဖက်အသုံးပြုနိုင်မည် ဖြစ်ကြောင်း သိရသည်။ ၎င်းဖုန်းလိုင်းများ အသုံးပြုနိုင်ရန်အတွက် ပြည်ပနိုင်ငံများမှ နည်းပညာ ကုမ္ပဏီများနှင့် မြန်မာ့ဆက်သွယ်ရေး လုပ်ငန်းတို့ ဆွေးနွေးမှုများ ပြုလုပ်နေကြောင်း သိရသည်။

 

မိုဘိုင်းကွန်ရက်၊ အင်တာနက်ကွန်ရက်နှင့် ပြည်တွင်းကွန်ရက်များ တည်ဆောက်ခြင်း၊ တိုးချဲ့ခြင်း၊ ဆက်စပ်ဝန်ဆောင်မှုများ တိုးချဲ့ခြင်းတို့အား ဆောင်ရွက်ရာတွင် နည်းပညာနှင့် စီမံခန့်ခွဲမှု နယ်ပယ်များအတွက် အတွေ့အကြုံရှိ ပညာရှင်များ၊ ကျွမ်းကျင်သူများ၊ ကျွမ်းကျင်လုပ်သားများ လိုအပ်မည်ဖြစ်သည့်အတွက် ထည့်သွင်းစဉ်းစားရမည့် စိန်ခေါ်မှုတစ်ရပ်ဖြစ်ကြောင်း ရတနာပုံတယ်လီပို့၏ အကြံပြု ဆွေးနွေးချက်များတွင် ဖော်ပြပါရှိသည်။ ယခင် မိုဘိုင်းတယ်လီဖုန်း သုံးစွဲမှုမှာ လူနည်းစုသာ သုံးစွဲနိုင်ရာမှ လူလတ်တန်းစား သုံးစွဲနိုင်သည်အထိ ရောက်ရှိလာကြောင်း လက်ရှိ ၂၀၁၂ ခုနှစ်၊ ဒုတိယသုံးလပတ်တွင် မိုဘိုင်းအင်တာနက်သုံးစွဲမှု သိသိသာသာ များပြားလာပြီး မြန်မာ့ဆက်သွယ်ရေး လုပ်ငန်းမှ 2G နှင့် 3G အင်တာနက်များကို ဝန်ဆောင်မှုပေးလျက် ရှိကြောင်း သိရသည်။ မြန်နှုန်းမြင့် မိုဘိုင်းဖုန်းများ ပြည်တွင်း၌ အသုံးပြုနိုင်လာခြင်းအားဖြင့် မိုဘိုင်းအခြေပြု စီးပွားရေးလုပ်ငန်းများလည်း တဖြည်းဖြည်း တွင်ကျယ်လာမည် ဖြစ်ကြောင်း လက်ရှိမိုဘိုင်းဖုန်း အခြေပြုဝန်ဆောင်မှု အချို့လည်း ပြည်တွင်းဈေးကွက်တွင် ရှိနေပြီ ဖြစ်ကြောင်း နည်းပညာ လုပ်ငန်းရှင် တစ်ဦးက သုံးသပ် ပြောကြားသည်။

ထွန်းထွန်း

Posted in: နည်းပညာ သတင်း